پاکستانی اداکارہ و ماڈل عائشہ خان نے اچانک شوبز انڈسٹری کو چھوڑنے کا اعلان کر دیا

پاکستانی اداکارہ و ماڈل عائشہ خان نے اچانک شوبز انڈسٹری کو چھوڑنے کا اعلان کرکے اپنے لاکھوں مداحوں اور چاہنے والوں کو حیران کردیا ، معروف اداکارہ نے شوبز انڈسٹری کو خیر آباد کہنے کا اعلان اپنی ایک فیس بک پوسٹ میں کیا ۔ تفصیلات کے مطابق عائشہ خان نے اپنی پوسٹ میں اپنے مداحوں اور چاہنے والوں سمیت دوستوں کا بھی شکریہ ادا کیا اور ساتھ ہی سب کو درخواست کی کہ انہیں ہمیشہ دعاوں میں یاد رکھا جائے ۔ عائشہ خان نے پوسٹ میں لکھا کہ ’انہوں نے سوچ سمجھ کے بعد اپنی خوشی سے میڈیا انڈسٹری کو ہمیشہ ہمیشہ کے لیے بہترین طریقے سے خیر آباد کرنے کا فیصلہ کیا ۔ ساتھ ہی انہوں نے لکھا کہ وہ اپنی زندگی کے اگلے مرحلے کے لیے انہتائی پر امید ہیں کہ وہ اطمینان بخش ہوگا۔

انہوں نے شوبز انڈسٹری سمیت باہر کے دوستوں اور مداحوں کا شکریہ ادا کرتے ہوئے لکھا کہ کیریئر کے دوران ان کی بہت ہی بہترین افراد سے ملاقات ہوئی اور انہوں نے ہمیشہ انڈسٹری میں ذمہ داری کے ساتھ پیشہ ورانہ ذمہ داریاں نبھانے کی کوشش کی ۔ ان کا کہنا تھا کہ ان کے قریبی دوست جانتے ہیں کہ انہوں نے 2016 سے بہت ہی کم شوبز منصوبوں میں کام کیا اور کچھ منصوبے تو اس کے لیے تاخیر کا شکار بھی رہے، جس پر وہ معزرت خواہ ہے ۔ انہوں نے شوبز انڈسٹری کو خیرآباد کہنے کو اپنی نئی زندگی کی قسمت تلاش کرنے کی جستجو قرار دیتے ہوئے مداحوں، ساتھیوں اور دوستوں سے دعاوں کی گزارش بھی کی ۔ اگرچہ عائشہ خان نے شوبز انڈسٹری کو خیر آباد کہنے کا اعلان کیا ، تاہم انہوں نے اس فیصلے کی وجوہات نہیں بتائیں۔

خیال رہے کہ 35 سالہ عائشہ خان نے کیریئر کا آغاز 2000 سے ٹی وی ڈرامے سے کیا ، جب کہ انہوں نے 2013 میں پہلی فلم ”وار“ سے فلم ڈیبیو کیا ۔ انہوں نے 50 سے زائد ڈراموں اور ٹی وی سیریلز میں اداکاری کرنے سمیت 5 کے قریب فلموں میں بھی کام کیا ، جب کہ وہ متعدد منصوبوں کے اندر ماڈلنگ کرتی نظر آئیں ۔ ان کی آخری فلم 2015 میں ریلیز ہونے والی ’جوانی پھر نہیں آنی‘ تھی، جب کہ ان کا نشر ہونے والا آخری ڈرامہ ’میری ننھی پری‘ ہے۔